بصيت لروحى فجأة…


لم أجد أجمل من مطلع هذه الأغنية الرائعة لنجم الجيل الأصلى عند الميكروباصات و التكاتك تحديدا لبدء كلامى اليوم…وهو من أغنية أعتقد لا أعرف اسمها بالتحديد لكن بقية كلمات الأغنية تقول:

قوليلى يا مرايتى…قوليلى ايه حكايتى…!!!

سمعت اليوم عن الخطاب الذى سيلقيه د.عصام شرف بعد اجتماعه بالمجلس العسكرى-الراعى الرسمى للثورة المصرية 2011-وقد كنت فى الصيدلية أعمل فى شيفتى اللولبى أو ال ان ليمتد والذى يبدأ من 12 ساعة…مع ازدياد العمل وعدم وجود تليفزيون بالصيدلية لم استطع متابعة الخطاب…ودخل على شاب سألته عن البيان قال لى:”عادى يعنى…..!”

بعد أن عدت الى البيت حمدا لله…فتحت صفحات النت…ووجدت بعض ما قاله السيد شرف…وما أعقبه من هجوم من الائتلافات و الأحزاب و المعتصمين بانه لا يحمل أ جديد…

لم أفاجأ من ذلك ولا ذاك…هذا هو ما يحدث دوما خلال هذا العام…بداية من خطابات السيد مبارك شكر الله سعيه!!!!

ما سبب لى حالة من التلبك المعوى المصحوب بارتاف مفاجىء مؤقت بضغط الدم و ازدياد شديد للحموضة مع شبه أزمة قلبية هى تلك التعليقات:

 

 

مش علشان 2000 علمانى فى التحرير رغم انى عارف ان فيه ناس شرفاء بينهم ومنهم اصحابى 

نلاقى كل حاجة شرف شرف

الراجل جاب اخره وكل الحكاية بيقول على اخر الاسبوع من الاخر مطالبكم بتزيد كل شويه

ناويين على ايه انا عارف مش حتسكتوا الا بالدستور اولا

 

الناس دى مين بيمولهم ومين ببيصرف عليهم لازم نعرف

 

عدم الاستجابة لاي طلبات اخري لهؤلاء …. امبارح طالبتوا تغيير بعض الوجوه في الحكومة لصلتهم بالنظام السابق …. لما تمت الاستجابة لهذا المطلب الان تطالبون باستقالة شرف نفسه !

بالامس طالبتم بوضع جدول زمني لتحقيق المطالب الرجل خرج اليوم بجدول زمني محدد لكل مطلب برضوا مش عاجب !!

 

الهدف هو تنحية المجلس العسكرى والمجئ بمجلس ئاسى مدنى وبالتالى تاجيل الانتخابات ووضع الدستور الذى يحلم بة العلمانيون

اما الهدف بالنسبة للمتامرين الوصول الى اختراق الجيش عن طريق مهاجمة المجلس العسكرى ومحاولة شق صفوف الجيش عن طريق استخدام المقولة الخبيثة ان المجلس العسكرى غير الجيش

 

هذه التعليقات جاءت كلها على نفس الشاكلة فى موقع مصراوى ردا على خبر بعنوان

التحرير: خيبة أمل واحباط بين الثوار بعد خطاب شرف

 

بعض قراءة هذه التعليقات…سألت نفسى عددا من الأسئلة:

1.هل فعلا من يجلس فى التحرير كلهم علمانيون؟

الاجابة:أكيد…اذا كان العلمانيين بيبدأوا كلامهم بالقرآن…وبقوا بدقون…ومنهم منتقبات…وعمال…صنايعية مثلا…وطلبة جامعة…و دكاترة…وبنات محجبات…ممم…والشباب الملتزم المحترم اللى مبيسمعش أغانى وبدقون!!!

والاخوان غالبا علمانيون…لأنهم حضروا الجمعة اللى فاتت…مش مهم مشيوا امتى…المهم انهم راحوا…

والجديد بقى انى أول مرة أعرف ان العلمانيون بيصلوا جماعة…أصلى صليت معاهم….يا نهار أزرق…ده أنا رحت التحرير يوم الجمعة!!!وقعدت يجى 3-4 ساعات…

ورحت يوم الأحد شوية!!!!!!

واستنتجت أن معظم الشعب المصرى وأنا من ضمنهم…علمانيون

 

2.لماذا نتعامل دائما بنظرية المؤامرة اليهودية الخبيثة؟؟؟

الاجابة:يمكن علشان اضحك علينا كتير قبل كده…فبقينا بنخاف من أى حاجة…فجزء من الناس يخزن شرف والمجلس العسكرى-أكرر راعى الثورة المصرية 2011-وجزء يخون العلمانيون-المعتصمين سابقا-وجزء يتهم دولة فنزويلا الشقيقة بالعبث فى الأمن الداخلى…

يعنى ممكن استنتج ان احنا مبنثقش فى بعض!!!

 

3.السؤال الذرى:لماذا لا يزال البعض يعتقد أن من يجلس فى التحرير هم جميعا عملاء و أجندات و وجواسيس ومن آكلى لحوم البشر؟؟؟لماذا يعتقد البعض أن هدف كل هؤلاء الناس هو تدمير بلدهم مصر؟؟؟

الاجابة:هى مش اجابة قوى…هو تحليل…ربما لأن الفنانة القديرة عفاف شعيب لم تستطع بسبب أحداث التحرير الماضية اطعام حفيدها بال-بيدزا والريش-ذلك الطفل الذى لم يبلغ العامان-بس الصراحة واضح انه جامد فحت,ده بياكل ريش!!!!-وربما لأن البعض صدق فعلا تامر بتاع غمرة لما قال”:أنا لقيتهم كلهم بيتكلموا انجلش كويس قوى”…وربما صدقوا آخرين…

تقريبا هؤلاء لا يصدقوا أن مبارك-شكر الله سعيه برضه-كان رئيس حكومة فاسدة…أفسد من البيض لما بيعفن…وتقريبا معندهمش قناعة أن الحكومة كانت وحشة…وأو بتسرق…أو ان التعليم باظ…أو ان الاخلاق راحت…

تقريبا اتوهموا ان احنا فى أفضل حال…ولعن الله كل شخص يعكر صفو استقرار ونوم هؤلاء!!!!

 

4.لماذا يعتقد البعض ان الاستقرار هو الحل لكل مشاكلنا…ويجب تدمير كل ما يعكر صفو هذا الاستقرار؟؟؟

الاجابة:أولا أريد تحديد نوع الاستقرار

هل هو ان احنا منحاربش؟؟؟مينفعش منحاربش…ليه؟؟علشان الدين قال كده..وأرجع أشكر الرئيس السابق فعلا على ان أنا قضيت سنوات طفولتى و مراهقتى فى حالة سلام

بس احنا هنحارب فى يوم من الأيام لا محالة

ومع ذلك….لا أعتقد ان ده نوع الاستقرار المقصود

طيب…يمكن الاستقرار بتاع نستنى الانتخابات؟؟؟أكيد فيها الحل…طب ازاى؟؟؟طبعا أنا موافق على الكلام ده…بس مش كله…ليه بقى؟؟؟لأن الصمت على بطء المجلس-لازلت مصر على امه راعى الثورة المصرية 2011-والحكومة ذات اليد المقطوعة فى -تكويس و كفتجة-كل القوانين و المحاكمات والدنيا على بعض…بحيث نقعد نسمع نسمع وفى الآخر نلاقى نفسنا محطوطين فى الأمر الواقع اللى على مزاج شخص ما مش عارفين هو مين…طب احنا مفهمناش من أيام الحكومات السابقة أساليب الضحك على الشعب مثلا؟؟؟وهل احنا مفهمناش ازاى الحكومة -بتنيمنا-لحد ما نقتنع بأن اللى بيعملوه ده هو من مصلحة الشعب المصرى؟؟؟

وفين بتوع المؤامرة السابق ذكرهم…المفروض انهم يعرضوا على هذا الاستقرار لأن ده من طبيعتهم!!!

بلاش

يمكن استقرار بتاع لازم كلنا نشتغل؟؟؟

نشتغل فى ايه بالضبط…ومين هيسيب شغله اللى بيأكل بيه عياله و يقعد و خلاص فى الميدان؟؟؟أيوا يعنى العيال هتأكل منين؟؟؟

وبعدين أنا كفرد مبروحش يوم أجازتى….وأعرف كذا واحد كدا…أحيانا بروح لما تسنح الفرصة…ماباسيبش الشغل يعنى

والى سايب شغله…غالبا مبيشتغلش أو مبيلاقيش شغله جايب همه

عموما من الخطأ نظريا تعطيل المصالح الحكزمية لأن فى ناس فعلا ليها مصالح عايزة تخلصها و مضطرة…بس ده الجانب السلبى فى الاعتصام…كل حاجة ليها ايجابيات و سلبيات…

أخيرا…الاستقرار-فى رأيى الشخصى-لو مشى بنفس ظريقة السنين اللى فاتت…مش هنوصل لأى حاجة!!!

 

انتهت الأسئلة…وقعدت أناقش نفسى بقى…

ليه فى ناس بتكره بتوع التحرير؟؟؟

علما بأن القعدة فى التحرير شىء لا يطاق بالنسبة للمعتصمين…أنا قعدت فى خيمة منهم لمدة 20 دقيقة…تعبت من الريحة بس…الناس بتنام على الأرض…والأكل و الشرب حسب الظروف…يعنى الاعتصام مش فى الهلتون

وبما انى رحت التحرير مؤخرا أكثر من مرة…أقسم بالله العلى العظيم تلاتة…ان ما حد جابلى كنتاكى…ولا حتى التابعى ولا الشبراوى!!!ومحدش ادانى 50 يورو….والله ولا ربع جنيه مخروم…الا واحد بس-للأمانة يعنى-كان معاه أزايز مياه ماليها و وزعها على الناس…

يبقى سؤال خارق…الناس بتستفيد ايه من الاعتصام فى الشارع…لو فضى فيه قهاوى…أما نومة فى الشارع مش داخلة دماغى الصراحة…!!!

 

وكالعادة ظهر ناس بتقول ما كفاية اللى الراجل بيعملوا…هيعمل ايه تانى…تعليقا على بيانات شرف

أذكر انى سمعت نفس هذه التعليقات بعد خطابات مبارك-شكر الله سعيه-

يبقى ايه مش مفهوم؟؟؟

 

بعض الناس بتطالب المجلس-راعى الثورة المصرية 2011- بالرحيل…هو أمر غير منطقى طبعا رحيل الجيش…يرحل فين يعنى؟؟؟

بس مش معنى كده انه يفضل قاعد مبيعملش حاجة خالص…ومقيد الحكومة…وفاقع فى الناس!!!

هو يحتاج الى التقويم…أو مناقشة الناس…

والغريب ان المجلس-راعى الثورة المصرية 2011-كان يقدر يضحك على الناس فعلا…وبحاجات سهلة قوى…والأغرب انه معملهاش و بدالها قاعد-يفقع فى الناس بقرارات وبيانات عجيبة-

ما علينا…

 

فى بعض الناس بتطالب بوقف الاعتصامات والمظاهرات لعودة الأمن…

بالله على أى حد…امتى الأمن و الأمان كانوا مستفحلين فى الشارع؟؟؟

سرقة,اغتصاب,تحرش,قتل,مخدرات,بلطجة وغيرهم

أخبار حوادث الأهرام صفحتها عمرها ما فضيت فى آخر كام سنة…

لا و طلع جرايد متخصصة بعد كده فى الحوادث بس!!!!

وبعدين أرجع و أقول…

الشرطة اللى ضربت الناس

وأمن الدولة اللى كهرب و عذب وعمل بلاوى

واللذيذ ان الشرطة بعد الثورة…طلعت هى هى اللى قبل الثورة

شوية قالوا احنا مش هننزل علشان الناس زعلانين مننا واحنا خايفين منهم-وده كلام قالهولى ضابط أيام اللجان الشعبية-علشان يوقف 3 أمناء معانا

ونزلوا بعد كده ضربوا و شتموا وعملوا اللى عايزينه…والمفاجأة انهم جابوا قنابل غير بتاعت يناير…القديمة كانت أمريكانى

الجديدة بقى أسمع انها اسرائيلى…!!!

يعنى الفرق بين الشرطة قبل و بعد الثورة نوع القنابل…

وفعلا على رأى الشباب -القليش-

الشرطة دى طلعت حاجة مسيلة للدموع!!!!!

 

أنا بعد كل ده استغرت نفسى…

كنت من 3 سنين بقول مبارك جايب لنا الاستقرار و الهدوء…وشوية فساد فى الدولة عادى لأن ده بيحصل فى أى مجتمع

فضلت الفكرة دى تتلاشى سنة ورا سنة…لأنى كل ما بكبر بلاحظ بلاوى أكثر…انتشار العشوائيات…وازدياد الفقر…وسوء التعليم…والحاجات اللى كلنا عارفنها…وأهمها انتشار النفاق بشكل يفوق الطبيعى…وبقيت بسأل ليه يعنى احنا مش زى أى بلد متقدمة…ناقصنا ايه يعنى…حتى اندلاع الثورة

بقيت ثورجى…وبروح التحرير بقى وكده يعنى

لاحظت ان فكرى اتغير…وسقف طموحاتى زاد تماما

وكثيرا ما قابلت الاحباط متنكرا فى صورة بنى ادمين بيهاجموا الثورة والشباب بشكل عام…

المهم دلوقتى وصلت لمرحلة…بصيت لروحى فجأة…وقوليلى يا مرايتى…ايه حكايتى!!!!

 

وأنا حاليا أهيب بشعب مصر العظيم…فرد فرد…بعد رحيل الرئيس السابق-شكر الله سعيه-أن يستمع الى الرائع عبدالباسط حمودة وهو يغرد بتلك الأغنية-الخرافية-ويسألون أنفسهم جميعا…

قوليلى يا مرايتى…قوليلى ايه حكايتى؟؟؟

حتى يحددوا مطالبهم…وطموحاتهم…وما يريدونه فعلا فى هذه الحياة…عايزين يوصلوا لايه…وايه الصح اللى يتعمل…وازاى نتجمع ونبقى فعلا ايد واحدة…

أو بمعنى آخر…

كيف نستطيع بناء مصر الحديثة مرة ثانية…لأننا فى عصر بناء الدولة من جديد….أتمنى أن يدرك الناس هذا الأمر…واننا لسنا فقط نعبر من محنة…

 

بعد كتابة هذا المقال…أتوجه بالشكر الخاص الى:

1.الرئيس السابق-شكر الله سعيه-على جلب حكومات و أفراد لا تفهم فى أى شىء و جعلهم قادة للبلاد مما أدى بها الى الهاوية…ولكن اصراره على ذلك جعل الشعب المصرى يبدأ فى العودة الى هويته أو على الأقل رشده مرة أخرى بعد قيام الثورة

 

2.المجلس العسكرى-الراعى الرسمى للثورة المصرية 2011-لأانه طالما قال ذلك فى كل مناسبة وفى كل حدث…عمل زى موضوع الضربة الجوية…وجون مجدى عبدالغنى!!!

أدعو هذا المجلس الى اعتبار الشعب المصرى بشر طبيعين وعاقلين…زيهم زى الأمريكان و الاسرائيلين-عذرا على التشبيه-فى الحقوق والواجبات…

وأدعو المجلس الى اعادة النظر فى كل أموره حتى لا يذهب حق رعاية الثورة الى-اتصالات أو فودافون-فى العام القادم…

 

3.أشكر عبدالباسط حمودة…هذا المواطن…الذى ألهمتنى كلماته لكتابة ما سبق

 

ودمتم بخير…

 

@Amr_Rageh (Twitter)

https://amrrageh.wordpress.com

 

 

 

Advertisements

Posted on July 12, 2011, in فضفضة. Bookmark the permalink. Leave a comment.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: