Monthly Archives: August 2011

عن الرز باللبن و أشياء أخرى…بقلم هديل عبدالسلام


ايه أوّل حاجة بتيجي في بالك لما تسمع كلمة رز بلبن ؟

حاجة حلوة .. ومسكّرة .. ولذيذة .. وخفيفة وصايصة .. بتتاكل بسرعة .. وما بتشبّعش

بتحبه ؟ .. لو ما بتحبّوش اقفل المقال مفيش داعي تكمّل D=D=

ايه شعورك بعد ما تاكل طبق الرز بلبن ؟ .. أو وانت بتاكل الرز بلبن .. النشوة والانبساط وجو السحابة بقى ويا سلاااام .. وهوووووووب .. خلص الطبق .. اتفصلت انت كدة ،، صح ؟؟ والمشكلة، إنك ما شبعتش .. ما هو محدّش يبقى جعان يقوم واكل طبق رز بلبن .. لأنه زي ما قلنا ما بيشبّـعش

لكن ممكن جدا لما تجوع .. تروح تضرب طبق كشري بالشطة .. أو دقيّة بامية ( وعشان انت مصري ما تقولش عالبامية يععع ) .. ولو ليك في الحاجات الحرشة بقى ممكن تاكلك طبق محشي وجوز حمام .. بس غالبا هتتلكم ومخك هيقفل وهتنام .. وممكن برضه تاكل ساندويتش جبنة وهتشبع برضه .. بس الأكيد إنه الرز بلبن عمره ما بيشبّع

أنا ليه بتكلّم عن الرز بلبن والبامية والمحشي ؟ .. ندخل في الموضوع عشان أكيد أنا مش جاية أتكلم في الطبيخ

أنا عندي رؤية صغيرة كدة أو نظرية مصغّرة عن عقول الناس وخصوصاً .. البناااااات .. لأنه مخ البنت دة حاجة صعبة جدا مش زي ما الناس فاكرة

ولأنه البشر أنواع .. ولأنه كل واحد دماغه مريحاااه .. ولأن أهم حاجة عندنا كمصريين هي الأكل .. ومحدش يقوللي لأ مش صح ،، لأنه لو دوّرت هتلاقي كل مشاكلنا الكبيرة بتتمحور في النهاية حوالين الأكل .. رغيف العيش .. أنبوبة البوتاجاز .. كيلو اللحمة .. الزيت والسكر .. التموين .. كله في الآخر بيلف يلف ويرجع للأكل .. حتى الشغل بنسميه ( أكل عيش ) .. وكأنك بتشتغل عشان تاكل بس .. ما علينا

المهم إنه عشان كدة أنا قررت أقسم امخاخ البشر بالأكل

عندنا أول نوع وأهم نوع واللي عشانه كاتبة المقال هو مخ الرز بلبن .. وعشان كدة أنا اتكلمت عن مواصفات الرز بلبن .. النوع دة منتشر في البنات اكتر ودة ما يمنعش إنه في ولاد برضه مخهم رز بلبن .. بس الأصل إن دة نوع بناتي .. واللي يلاقي نفسه بتنطبق عليه مواصفات المخ دة وهو ولد .. يحاول يعيد التفكير في مخه ويظبطه .. لأنه من أهم مواصفات الرز بلبن .. إنه صايص .. ومن الممكن تقبّل بنت صايصة .. لكن ولد صايص دي بتبقى صعبة حبتين

البنت دي .. أولاً لازم ولابد تبقى بتحب المسلسلات التركي .. ومن الشروط إنها تكون بتسمع إليسا وفضل شاكر وكاظم الساهر .. مع احترامي طبعا للفنانين الحلوين .. مواصفات مخها زي ما قلنا .. لذيذ ومسكّر( ممكن توصل لدرجة التلزيق ) .. دماغها خفيفة كدة وبتروح وتيجي حسب الظروف. وصايصة ،، يعني مالهاش رأي في أي حاجة .. بس مريحة الحقيقة .. لأنها معظم الوقت موافقة .. عشان معندهاش استعداد أصلا تفكّر كتير .. لأنه معروف إنه الرز بلبن لما بتقلبه كتير بيسيح .. لازم تسيبه زي ما هو وياريت تحطه في التلاجة عشان يحافظ على قوامه .. وإلا هيبقى مية !!

بالنسبة لمجالات أفكار النوع دة .. فهي بتنحصر في حاجات محدودة .. يعني رياضة مالهاش .. سياسة مالهاش .. علم مالهاش برضه .. تحب الفن .. ومش كل الفن .. يعني مش هتلاقيها بتتفرج على فيلم وثائقي مثلا أو على ناشيونال جيوجرافيك .. فن من نوعية عمر وسلمى وعن العشق والهوى وآه يا ناري يا ناري ازاي أداري أداري .. وما بتستحملش الفن التقيييل .. زي مارسيل خليفة أو تتفرج على فيلم لداوود عبد السيد مثلا أو الحاجات دي .. بس تلاقي نفسها جدا في تامر حسني وساندي وعمرو دياب .. مع

احترامي تاني للفنانين وللي بيحبهم طبعا

البنت دي مثالية جدااااا للجواز ( طبعا الجواز بالمفهوم المصري العتيق .. اللي هو الجواز من أجل الجواز .. نتجوز .. نجيب عيال .. نوديهم المدرسة يجيلهم تخلّف .. نزيد المجتمع عاهات على عاهاته ) .. بتبقى لقطة يعني .. مطرح ما توديها هتروح ومطيعة وبتسمع الكلام .. ممكن تكون رغاية شوية .. لكن سهل تتعامل مع الموضوع دة .. لأنه رغي مش محتاج اي نوع من التركيز ومش محتاج منك ترد أو تناقش أو تفتح بؤك أصلاً .. ممكن تسمع وتهز راسك وهي هتصدّق إنك سامعها .. وبعدين تدخل تنام عادي جدا .. ولو على ولد .. هيمشي جدا مع البنت اللي بتدوّر على واحد مريح وبيسمع الكلام وجو ( خاتم في صباعها ) .. هيمشي جدا معاها زي طبق الرز بلبن بالظبط !!

فين المشكلة بقى ؟ .. المشكلة انه النوع دة عندنا منه كتيييييييييييير أوي .. وزي ما انتوا عارفين احنا بلدنا كانت مزدهرة اجتماعيا وعلميا وفنيا .. فأنتجنا مجتمع مفكّر .. متعلّم .. ثقافته عالية .. مخه متفتح وناضج .. طبعا الثورة اللي قامت أثبتت إنه البلد فيها ما شاء الله بامية ومحشي وسندويتشات كتير .. بس بعد ما الدنيا هديت كدة وكل حي رجع لحاله .. اكتشنا انه البلد ما زالت غرقانة في الرز بلبن وصايصة عالآخر. .. أنا مش معترضة عالنوع دة من الامخاخ أد ما أنا معترضة على فكرة إنه الناس تعتبر إنه دة الطبيعي .. وانه الخارج عن كدة هو اللي مش طبيعي وقادم من الفضاء مثلا

يعني مش لازم الولد يكون كل تفكيره موجّه إما للكورة أو للجيم أو للقهوة اللي بيقعد عليها هو وصحابه أو في الشغل اللي هو بيشتغله ولا التعليم اللي بيتعلمه وخلاص .. الطبيعي هو إنه الواحد يبقى بيقرا وبيعرف وواعي لكل حاجة حواليه .. يعني ليه مش دة هو الطبيعي .. ليه اللي بيبقى كدة بيبقى استثناء وبنعتبره حاجة مختلفة وننبهر بيه كأنه عامل انجاز خرافي ؟؟

ومش منطقي إنه البنت عشان تبقى بنت ويتقال عليها ( بنوتة ) .. تبقى مخها رز بلبن .. ايه المانع إنه البنت تبقى بتقرا كتير أو بتفكّر في كل حاجة وواعية للي حواليها وليها رأي وكلمة .. دة ما يقللش من كونها بنت .. خالص يعني .. ايه المشكلة لما تبقى البنت .. ( بتشبّع ) .. مش زي طبق الرز بلبن .. تاكله وتتسلّى وتنبسط وبعدين ما تشبعش وتروح تجبلك طبق تاني ما يشبعكش برضه !!! .. مش المفروض إنها تبقى حلة محشي وتلكم اللي قدامها .. بس ما تبقاش صايصة ومهلبية .. ايه المشكلة لما تبقى ساندويتش مربى بالقشطة مثلا ؟؟ .. بيشبع ومغذّي وفي نفس الوقت مسكّر ولذيذ

احنا مجتمع عاوز إصلاح .. عاوز تغيير أفكار ومعتقدات اتعوّدنا عليها .. عاوز إعادة هيكلة عشان ما يعرفوش يغيّبونا عن الوعي تاني .. لأن احنا اللي ضيّعنا هو إن احنا قبلنا إن احنا نغيب عن الوعي .. قبلنا الواد يبقى في الكورة والبنت تبقى في الأغاني وخلاص .. طبيعي المجتمع يبقى في كل حاجة .. لكن محتاجين نبطّل نظرية ( القالب ) .. يعني إنه مواصفات البنت عشان تبقى بنت مصرية ( كذا كذا كذا ) .. لأ .. مش دة الصح .. وخصوصا لما تبقى المواصفات دي أصلا مجحفة أو غلط .. احنا عندنا اتجاه غريب لتهميش مخ البنت .. ولو فكّرِت زيادة شوية يتقال عليها ( مسترجلة ) وخارج السرب .. لحد ما بقوا البنات كلهم شكل واحد ونمط واحد وعجينة واحدة بطريقة تدفع للملل !! .. وكذلك الحال في الولد وان كان مخ الولد له حرية اكبر يروح وييجي براحته ويفكّر براحته .. لكن البنت لأ ،محطوطة في خانة وشكرا على كدة وحرية المرأة مش في إنها تنزل تشتغل .. أصل مش دي الأزمة .. ممكن جدا تنزل الشارع وتشتغل وكل حاجة وبرضه مخها يفضل صايص عادي جداااا

.. ممكن فعلا تكون البنات هي اللي جابت دة لنفسها .. بس المجتمع ما صلحلهاش الغلطة .. بالعكس دة ساعدها عليها .. لحد ما وصلنا للمرحلة دي .. الاجيال الجديدة بتتربى على ايد النوع دة من البنات .. وطبيعي ما تطلعش حاجة عظيمة في الآخر.. فأظن إن احنا محتاجين نعيد التفكير في ( مخ ) البنت شوية .. لأنه في النهاية .. البنات دي هي اللي لما تكبَر هتربّي الجيل الجديد .. الراجل بيروح شغله والبنت اللي بتربّي العيال في الآخر .. فلو البنت مخّها أصلا بزرميط .. ما أتوقعش منها تربّي عيال مخها عشرة على عشرة .. فمش المفروض إنه الواحد يفرح بالبنت اللي مالهاش فيها

البنت مش نص المجتمع .. البنت هي المجتمع كله ( ومش عشان أنا بنت والله ) .. بس لو بصّيت هتلاقي إنه البنت هي اللي بتربّي الولد والبنت في الآخر .. ولما تربّي بنتها كويس وابنها كويس .. بنتها دي هتربّي الجيل اللي بعدها كويس .. وابنها دة هيختار بنت صح تربيله العيال كويس .. وبكدة ينصلح المجتمع .. والتربية مش أدب والتزام وخلاص .. التربية تكوين بني آدم .. مخك وتفكيرك وتوجهاتك وأهدافك وكل حاجة في حياتك في الحاضر والمستقبل بتتبني عن طريق التربية ..

حتي العلم .. المدارس ما بتعلّمش كل حاجة .. يعني مثلا أنا مش فاكرة أنا علّموني ايه في المدرسة وأنا عندي 13 سنة .. بس فاكرة إني في السنة دي نفسها أبويا ادّاني سلسلة العبقريات لعباس محمود العقاد قريتها كلها وأنا في السن دة .. وفاكرة كويس أد ايه كانت صعبة بالنسبالي وقتها .. وأد ايه كنت مستغربة من أبويا إنه بيقرّيني حاجات صعبة كدة .. ما عرفتش قيمتها غير لما كبرت .. بس فاكرة إني من ساعتها لحد النهاردة وانا مبهورة بخالد بن الوليد لدرجة إني نفسي لما أخلّف ولد أسميه خالد بس عشان بحب خالد بن الوليد ومعتبراه قدوة وصورة للولد اللي نفسي أربّيه .. وفاكرة كويس إني في الصيف أمي كانت بتديني فلوس أنا وأخويا نشتري روايات ما وراء الطبيعة للعبقري أحمد خالد توفيق اللي ممكن ظاهرياً تبان مجرّد قصص رعب لكن دي كانت جزء من تعليمي وتربيتي وأسلوبي .. وكنا بنبقى مبسوطين جدا بيها .. وازاي إنه الراجل دة فضل من ساعتها ولحد دلوقتي واحد من الناس اللي بقتدي بيها .. فقدوتك بتتحدد وانت طفل.

عشان يبقى عندك مجتمع سوي .. البيت أولاً وعشان يبقى عندك بيت سوي يعملّك مجتمع راقي ومتعلّم .. لازم البيت دة ما يبقاش صايص .. ما يبقاش رز بلبن .. عشان يبقى ماسك نفسه .. ويطلّع جيل أفضل ومجتمع أفضل .. ومصر أحلى وأجمل

ولأنه مصر في حالة ثورة .. ما ينفعش الناس تفضل زي ما هي .. ولأنه احنا بنبني بلد من اول وجديد .. بنبنيها من أساساتها .. لازم البنت والولد يبقوا حاجة مختلفة .. زي ما تبقى في حالة حرب وتبقى عاوز الشعب كله جنوووود .. نفس الفكرة .. انت بتبني بلد فلازم المجتمع كله يفكّر بشكل مختلف .. لا الواد ينفع يفضل بايع دماغه .. ولا البنت ينفع تفضل رز بلبن

ال فلاج مان


بسم الله الرحمن الرحيم,وبه نستعين….
اللهم أغفر لنا ما تقدم من ذنبنا…وما تأخر,واهدى شباب و بنات المسلمين الى صراتك المستقيم…
وأرنا الحق حقا و أرزقنا اتباعه…وأرنا الباطل باطلا و ارزقنا اجتنابه…
ووفق الأمة لما فيه الخير…وقونا على شرور أنفسنا…
وارزقنا الجنة…
وصلى الله و سلم و بارك على سيدنا محمد و على آله و أصحابه أجمعين…

ليلة من الليالى العشر الأواخر من رمضان…ليلة 21 بالتحديد…وربما تكون ليلة القدر…ولما لا؟
لابد من أن نبدأ بالدعاء…لعل الله يغفر لنا و يهدينا و يرحمنا….وينصرنا

راجع البيت بعد الشغل…والغريب ان مابيحصلش حاجة فى الأيام أو الشهور الأخيرة غير فى ساعات الليل الأخيرة…
راجع بعد سماع و مناقشة البعض فى أمور حول الثورة…
ومحاولة اقناعى المستمرة للبعض بأننا بلاش كشباب مصر…كشعب مصر…قمنا فعلا بثورة…وعزلنا فعلا نظام…وحوارات من هذا النمط اللى الفروض قدمت بقى…!!
المصيبة فى الحوار…أو اللى بيجيبلى ارتفاع مفاجىء فى الضغط…
اصرار البعض…وعلى رأى مبارك-ربنا ما يفك سجنه-قلة من أبناء وطنى…مازالوا يصرون على أن الثورة هى مؤامرة…
نعم مؤامرة…هو الاختلاف بس فى مين اللى عملها…
مؤامرة امريكية اسرائيلية مصرية صربية عربية ارجنتينية مريخية مشتركة!!!!!!
وطبعا الجيش و الشرطة أكيد شاركوا فيها بشكل ما…على حد قول البعض!
ناس بتقول هو أصلو كان بمزاج الجيش و هو اللى عمل كل حاجة…
وغيرو يقول: أمريكا ازاى هتسيب الناس تعمل كده…
المهم فى المحصلة يعنى…اللى عمل كده كان أى حد غير المواطن المصرى “البسيط” عموما…وغير الشباب المصرى تحديدا…
المهم مروح…والأفكار تتناقل فى دماغى ما بين الكلام ده…والامتحانات اللى عندى…واللى عايز أعمله فى حياتى…والفكر المركب التكعيبى ده…

سمعت ناس بتقول سفارة…وعلم…واتحرق…وراجل…!!!!!!

قلت أما أشوف…
أكيد مش محتاج أحكى اللى حصل وأتحول الى مسلسل تركى من اللى مبيخلصوش دول!!
المهم انى بعد ما كنت مروح فى محاولة انى أذاكر…غيرت وجهتى تماما…قعدت أتفرج..وأشوف اللى حصل…وأقول عبارات من نوعية “يا رتنى كنت معاهم” و الكلام ده…
وصليت الفجر…وطلعت أكتب…

كنت فى الأيام السابقة…وبعد قرائتى لجملتين بالتحديد…من أ.جلال عامر و أ.عمرو سلامة وهما تباعا:
-تحرير فلسطين يبدأ بالمعمل والجامعة والحقل والمصنع وليس بخطب الرؤساء «القوميين» أو مواعظ الزعماء الدينيين
-و يظل الخوف موجود، ليس من من هم تحت خط الفقر.. بل من هم تحت خط الفكر

والى حد ما…أعتقد ان تفسير الجملتين:
“لن نحصل على أى نصر الا بالتعليم و العمل”….ده ببساطة قوى يعنى…
وفى أمر أهم من الاثنين…وهو واحد و غير قابل للتغيير…
“أن نؤمن بالله و نؤمن بقوتنا و نتوكل على الله”….ببساطة برضه

أنا فى الحوارات اللى فوق تسائلت…ليه مفيش ايمان خالص ان فيه شباب كويس…ممكن يعنى ييجى منه…طب حبة منهم كويسين…طب أى حاجة…
بلاش…
ليه أعجوبة الأعاجيب ان احنا نكسر نظام و لانمشى واحد…قدرة ربنا…وربنا قادر على كل شىء…عادى يعنى….
تأتينى الاجابات تحمل كلمات: الشباب…المخدرات…المصريين حرامية…وما الى غير ذلك…
هذا واقع لا يستطيع أحد نكرانه…ولكن مفيش جانب مضىء من أى نوع؟ مفيش حد حبوب و كويس؟؟ مفيش فايدة يعنى؟؟؟

ولكنى تفهمت تماما…للمرة 2345…ان الحكومات السابقة فى عهد الرئيس السابق لم تعلمنا الا شىء واحد وهو كان من أهم الأهداف:
النظر الى نص الكوباية الفاضى…وان الكوباية غالبا مكسورة…و لو فضيت محدش يملاها…
الشباب فيه بلاوى و سقطات كتير…جزء منها مسئول عنها الحكومة…وجزء مسئول عنه الآباء و الأمهات…وجزء مسئول عنه المدارس والجامعات…و أخيرا جزء مسئولين هم أنفسهم عنه!!! اذا ففسادهم نتيجة لحاجات كتير يعنى…متولدوش كده!!!

و الأهم من كده…ان مش كلهم كده…و لو كتير منهم كده…هتلاقى تحت الزبالة دى بنى آدم عايو يبقى نظيف…البعض بيحاول…والبعض مستنى…والباقى مطنش مستنى اللى يفوقه!!!

واذ فجأة….الاقى “الفلاج مان”…الاسطورة المصرية الجديدة اللى المفروض ينزلولها كوميكس بعد ما اتأكدت كمان انه الشخص العجيب اللى كان بيطلع على عواميد النور فى التحرير…
الفلاج مان و هى على غرار سبايدر مان و بات مان و القلش الأمريكانى ده…طلع فيه منه فى مصر بجد…

والسبب الوحيد انى قررت أكتب انهاردة و أسيب اللى وراية واللى قدامى هو الفلاج مان…أحمد الشحات

ما قيمة أحمد الشحات:
-قيمة تاريخية سيتذكرها التاريخ بانه أول من حرق العلم الاسرائيلى اللى فوق السفارة…
-قيمة معنوية من عدة جهات: أولا انه رفع الحالة المعنوية للناس الى أقصاها…ثانيا حسسهم بمقدوريتهم على القيام بكل ما هو صعب و أشبه بالمستحيل…ثالثا شفى غل المصريين الى حد ما بعد ما حكومتهم و مجلسهم وكسوها للمرة الكثير!!!
-أثبت للبعض…وهم قلة من أبناء وطنى أن الشباب فى منه أمل…مع العلم انى متأكد ان فى ناس هتقول انه ضارب ترامادول قبل ما يطلع…وواحد زى عمرو مصطفى يقول الراجل ده وراه حريفة فوتوشوب و اتفرج على اعلان…وواضح ان الراجل اتفرج على سبايدر مان ال3 أجزاء وفى ليلة واحدة…المهم أرجو أنه يكون ثبت للناس دى أى حاجة
-قيمة جغرافية و اقليمية…خطوة جديدة فى استعادة السيادة المصرية للمنطقة التى انهارت تماما و لم تتحدث عن وجودها الا الصحف المصرية الثلاث…
-بالنسبالى أنا…أنا كان نفسى أبقى هذا الرجل…يمكن فعلا أكثر شخص الواحد كان نفسه يبقى مكانه…لأنه عمل حاجة كانت واقفة فى زورى لمدة طويلة…نزل العلم…مش مهم الحرق…المهم انه نزله…ونفسى أعدى على السفارة و ألاقى العلم المصرى فعلا لسه محطوط…
للملاحظة فقط…تم اختيار موقع السفارة الاسرائيلية بعناية فائقة…لاحظوا السفارة بتطل على تقريبا أنا بعتبرهم أهم حاجتين فى مصر…
النيل…و جامعة القاهرة…
لكذا سنة..كنت شايف العلم ده محطوط لاذلالنا فقط لا غير…بيبص على النيل اللى هيبيضوا و يجولوا و جامعة القاهرة…مقر تعليم الشباب المصرى…
لمدة سنوات شعرت ان العلم ده بيحمل رسالة مفادها…احن جايين….أوعوا تنسونا…!!!

وشكرا للفلاج مان أو أحمد الشحات…على انه ريحنى من الاحساس ده انهاردة…

قيمة أخيرة للفلاج مان…انى أى حد لما يتجوز كده ان شاء الله و يجيب عيال…هيقولهم يا عيال يا هايفة…أنا من جيل الثورة اللى شيلنا مبارك…احنا جيل البيات فى التحرير…وجيل الفلاج مان…سمعتوا عنه؟؟؟

الفلاج مان هو بداية تأسيس جيل جديد ينتمى لمصر…جيل قوى غير منشأ فى أيام مبارك الغابرة التى تعلم المصريون فيها المشى جوه الحيط فعلموه لأبنائهم و أهاليهم كى يسلموا من الشرور…
جيل قوى..حر…معبر…وهيبقى عنده وسائل أكيد أجدد 100 مرة من الفيس بوك و تويتر…
جيل أعتقدأن الأمل فيه…الأمل مش فينا احنا…الأمل فى الجيل اللى لسه هيتولد…احنا مجرد طوبة للنصر…أو العودة…أو الحرية أيا كانت تسميتها…
وهنا يظهر أهمية ما قالاه الأستاذان جلال و عمرو….التعليم و العمل…والأهم كما أشرت…الايمان بالله و التوكل عليه…و نصدق نفسنا ان احنا ممكن نعمل أى حاجة…

عارفين بعد ما شفت ماتش مصر و الارجنتين فى كأس العالم…وشفت الشباب المصرى بيلعب كورة أقرب الى كورة برشلونة…من غير مبالغة والله…بس ايه اللى خسرهم فى رأيى؟؟
مش الظلم التحكيمى…ثقافتهم…
أدائهم-معلش هقلب مدير فنى شوية و ده كلام للى بيشوف كورة-اللى اتحول من الباصات الأرضية الصحيحة و الثرو باص الرائع و الجرى و تغيير الأماكن فى كل الملعب واللياقة البدنية و الحماس الرائع فى الشوط الأول…الى اعتمادهم على الكور الطولية اللى من أول الملعب لآخره علشان نلحق نوصل و نجيب جون…احنا كنا أحسن 100 مرة بس الفرق…بعد الظلم التحكيمى أدائنا اتهز تماما…و أداء الارجنتين ثابت- طول المباراة…ده الفرق
علما بأننا طول عمرنا نتعرض لظلم تحكيمى فى أى حتة…المنتخب الأول فى كأس القارات و سماعه لكلام كاكا لما قاله دى ضربة جزاء…ومنتخب اليد أمام فرنسا فى قبل نهائى كأس عالم مش فاكر فى انهى بطولة…ومنتخبنا الأول أمام الجزائر فى السودان…وحاجات كتير…
فى نهاية الفقرة الرياضية بشكر منتخب الشباب فعلا على تقديمه كرة جميلة و حظ أسعد المرات القادمة..
التعليم و العمل…
لما يبقى فى تعليم…تعليم كل حاجة…كل العلوم…تعليم أخلاقى و مجتمعى و دينى…تعليم الايمان بالله…واتباع كلام الرسول عليه الصلاة و السلام…فى رجل فاضل بيقعد معانا فى الجماع بعد صلاة الفجر…بيقرأ من كتاب رياض الصالحين…وهو يحتوى-لمن لا يعرف-على أبواب معينة…أو أفكار معينة زى باب فضل قيام الليل أو غيره…و الاتيان بالقرآن أو السنة بما يثبت هذا الكلام…ألمهم انى اكتشفت-وفعلا مكنتش متخيل كده-ان الاحاديث الشريفة و القرآن الكريم الكلام اللى فيهم عبارة عن ارساء قواعد الاخلاق و المعاملات فى المجتمعات…أو بمعنى آخر كيف تنشىء مجتمع متحضر متطور ناجح!!

لما يبقى فى تعليم…والتعليم لازم يبدأ منذ الصغر…عمرك ما هتلاقى مش آسفين يا ريس…ولا عمرو مصطفى و لاطلعت زكريا و لا البدذا…ولا جمال مبارك و لا أحمد عز…ولا بلطجية ولا حرامية…ولا تسمع دفع عجلة الانتاج و لا المواطن البسيط ولا نسعى للاستقرار ولا لن أسمح لأحد بأن يهين كرامة المواطن المصرى…هتون كلها حقائق…مش كلام بيتقال….!!!

لما يبقى فى تعليم…مش هيقولك اتفاقية كامب ديفيد و الحرب و خطر…لغة الخوف هتنتهى…وكمان لغة التهور الشديد زى يلا نروح اسرائيل اللى كانت من كام شهر مشى هتنتهى…هيبقى فى حساب و تفكير و تجهيز و توكل على الله…فربنا يوفقنا….!!!

لما يبقى فى تعليم…هيبقى فى عمل…وتطور…ومنستوردش…ولا نقول عمرنا ما هنبقى زيهم…هما اللى هيقولوا كده…وهنرجع نصدرلهم العلم تانى…

لما يبقى فى عمل…عمل خالص النية لله…وكله شغال…هيبقى فيه عدالة اجتماعية و حرية وكل اللى نفسنا فيه…!

ودمتم بخير…
وعلى رأى عمرو دياب…لما بيكتبها فى الكليبات بتاعته…
Inspired By: #Flag Man

DSC_5824

This is the brave man that removed the Israeli flag. His name... on Twitpic

#Cartoon - The Amazing #Flagman, Egyptian Spider Man - #Israe... on Twitpic

فاكس-الجزء الثالث-ثورة الأعداء


بسم الله الرحمن الرحيم

 

أما بعد…

 

صراحة أنا مش عارف ابتدى منين بالضبط…

 

هل نهنىء اعدائنا الاسرائيليين بالثورة؟

أم نهنىء أنفسنا بتأثيرنا الرهيب على العالم؟؟بما فيهم ألد ألد أعدائنا!!!!!!؟؟؟؟؟

 

وعلى رأى الشاعر:غريبة الناس

 

فعلا غريبة…هل لم يشعر الاسرائيليين طوال الفترة السابقة بنفس الأشياء التى دعتهم الى الاعتصام ثم الثورة؟؟

 

أكيد كانوا حاسيين

 

بس زى ما تونس ألهمت مصر

 

مصر ألهمت العالم ككل باسرائيل ذاتها!!!!!!!!!!!!!!!!

 

نيجى بقى للى قاموا بالثورة

 

هل هم شباب فاضى؟؟

هل هم علمانيين زى الشباب بتاعنا كده!!!!؟؟؟ما هو ده اللى ناقص صحفهم تقوله!!!!

 

ثورة مصر

الثورة التى أبهرت العالم

لم يفهم العالم كيف قامت و هدمت حصون و قلاع ضخمة

انبهر و صدقها و قلدها العالم

والوحيد الذى لم يقتنع بها

هو

المصرى!!!!!!

 

ثورة اسرائيل أو اعتراضهم…منعرفش هى هتوصل لفين

كان علشان قانون السكن و ارتفاع تكلفة المعيشة

وكيف يأثر ذلك فى شباب اسرائيل

اللى حس انه مضطهد

 

مش علشان أمن دولة و قانون طوارىء و حكم ظالم و كوسة اجتماعية و هبوط الحد الأدنى من الأجور تحت الصفر و الغلاء المستمر فى المعيشة و بلطجة الشرطة و سطوة رجال الأعمال و الناس مش لاقية تاكل و لا عارفة تشتغل و التعليم منيل و…….

 

لو كانوا شافوا كل ده…كانوا عملوا ايه؟؟؟

 

وبعدين فين الأمن المركزى الاسرائيلى؟؟؟؟

زفين القنابل السيلة للدموع المصنوعة فى اسرائيل و أمريكا؟؟؟ما شوفناهاش ليه؟؟؟

ولا عربيات بتدوس على الناس

ولا قناصة

ولا مطاطى

ولا أى حاجة

واضح ان الأمن المركزى-اللى هو غير الشرطة-مؤسسة مصرية أصيلة…مصنوعة فقط للقمع ليس أكثر!!!

وواضح كمان ان احنا مش بنى آدمين…احنا بنتعامل معاملة كلاب الشوارع الضالة

 

وفين الأغلبية الصامتة الاسرائيلية؟؟

وفين حزب الكنبة؟؟؟ايه الناس دى معنهاش كنب!!!؟؟

 

أرجع و أقول….

ثورة مصر كسبت العالم كله….الا مصر….علشان المصريين هم أول من هاجموها

 

صراحة…لن يشفى غليلى الا اذا قرأت ما هو فى السطور القادمة فى الواقع فى أى جريدة أو على أى قناة

بس الأول

دى أهم ما نشرته صحف اسرائيل القومية-زى الأهرام عندنا كده

 هاارتس

More than 300,000 demonstrate across Israel to protest high cost of living

Gideon Levy / Israel is beginning to celebrate a new independence

Avirama Golan / Israel’s social protesters are not just naive sushi eaters

موقع أخبار اسرائيل

Huge show of force: More than 300,000 Israelis hit the streets nationwide in one of the largest protests in the State of Israel’s history, as public anger over the skyrocketing cost of living reached unprecedented heights.

 

مقالوش يعنى قلة مندسة…ولا المئات من الأفراد…ولا القليل من أبناء وطنى…ولا الفكس ده

دى الصحف الرسمية…آه والله الصحف الرسمية

الأشياء المتوقعة بقى تتقال الأيام اللى جاية:

تكوين جروب على الفيس بوك بعنوان”احنا آسفين يا نتنياهو”

الفنانة عفاف شعيباف:ابن اختى مش عارف يأكل بدزا

الفنان عمرات مصطفافيت:صور تل أبيب كلها فوتوشوب

القناة الاسرائيلية التانية فى مكالمتها مع أفراد الشعب:ارجع يا نتنياهو احنا بنحبك ماتسبناش

وزير الدفاع الاسرائيلى:نحن مع الثورة منذ بدايتها…!!

الحكومة الاسرائيلية:من قام بالثورة شباب تم تدريبه فى معسكرات الحوامدية فى مصر

ليفى بتاع ايلات:فى ناس بتتكلم ارابيك لانجويتش كويس قوى حبسونا وضحكوا علينا و هما اللى مخلينا نعمل كده…أنا آسف مكنش قصدى

فنان اسرائيلى بعد ما عمل أغنية حقك علينا يا نتنياهو…بنفس التوزيع عمل أغنية حقك علينا-بكسر القاف-يا اسرائيل

التليفزيون الاسرائيلى:الشباب فى تل أبيب بياخدوا كل يوم 1000 شيكل و وجبة هارديز-حاجة غير الكنتاكى

الصحافة:استمرار الاعتصام يهدد الاستقرار و يعطل بدفع عجلة الانتاج

 

 

لو حد جاب فى اسرائيل سيرة عجلة الانتاج…مش عارف هعمل ايه!!!!!!!!!!

 

ولكى الله يا مصر…ودمتى بخير

ويا مصريين

دعوة الى كل مصرى…بيصوم رمضان و بيصلى التراويح و عارف ربنا و الكلام ده كله

نسيبنا شوية من الكورة و المسلسلات و المصايف و البدزا و المعانى الجميلة دى

لازم نحس ان احنا فى بلد

كلنا مسئولين عنها و عن اللى بيحكمها و عن اللى بيحصلنا

يا مصريين

شوية ضمير…حبة ضمير…أى نوع من أنواع الضمير

و تذكروا

الساكت عن الحق شيطان أخرس

دامت مصر لكل من يخاف عليها…ولعنت كل من يخاف على مصلحته-أولا-

 

فاكس…الجزء الثانى…عودة التنين الفقيع


نداء الى كل من يفكر أن يعود الى ميدان التحرير

التحرير فيه سم قاتل

……

……
……
كنت خارج مع أصحابى-على سبيل تغيير الجو و كده-ورجعت البيت قبل الفجر بشوية…المهم اتسحرت على عجالة…واتنيلت على عينى و فتحت المدعوق الفيسبوك اللى جابلى الضغط و هايجبلى السكر…والشوجر ماشى فى البلد وبياخد الصغيرين…وأنا صغير وواضح انه هيبهدلنى!!

 

دخلت أشوف ايه الجديد

 

وقد كان

 

عرفت ان فيه مجموعة من الناس راحوا يفطروا عند عمر مكرم-وعلى فكرة أنا بغلطهم على عملتهم دى و هاوضح ليه-وبعد ما خلصوا فطار قاموا وقالوا شوية هتافات شوية أقرأ انها عيش…حرية…عدالة اجتماعية

وشوية اقرأ ان كان فيه هتافات ضد الجيش

وحاجات كده

 

وفوجىء الناس دول بشرطة عسكرية و أمن مركزى بيضرب فيهم

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

 

جميل

 

السادة الكرام اللى اتضربوا

جزاء الضرب و البهدلة ده خدوه من عند ربنا…فحسبكم ربكم

 

بس أرجع تانى و أقول

انتوا اللى غلطانين…ليه بقى؟؟

 

فى المقالة السابقة…واللى أعدت تسميتها الى

فاكس…البداية

بكسر الكاف

أشرت الى انه تم فض اعتصام التحرير بالقوة و هو أمر فعليا أرضى الكثير من أبناء وطننا العزيز مصر

وطبعا ده علشان الأسباب الخرافية الهلامية الألمعية الذرية الفولازية المحورية التنينية

1.تحقيق الاستقرار

2.دفع عجلة الانتاج

ونركز قوى على عجلة الانتاج…تلك العجلة التى حيرت العالم…التى لم نعرف كيفية تحريكها وبالمناسبة أدعو الى جمع خبراء من منقبى الآثار و الجيولوجيين لمعرفة أسرار تلك العجلة و تأثيرها على الطبيعة و معرفة الى أى الأسر الفرعونية تعود…وهل كانت فعلا عجلة انتاج و لا عجلة حربية

أما الاستقرار…فاعتقد ان معنى الاستقرار عند المصريين مش سياسى ولا اقتصادى…ولا أمنى حتى…والدليل ان كتير من أبناء الوطن الأبرار راحوا مارينا و قاعدين على القهاوى وبيروشوا فى أكتوبر و بيروحوا سيتى ستارز

!!!

من الواضح ان الاستقرار عند المصريين زى استقرار طنط عفاف كده بحيث ان كل فرد يقدر يأكل ابنه الرضيع “بدزا” و “ريش”

 

المهم يعنى

اتفق الكثير من شعب مصر العطيم مع الجيش و الشرطة على وجوب انهاء الاعتصام

حتى جرائد المعارضة التزمت الصمت و مقالتش كتير عن الموضوع…وهو ما أثار استغرابى

ولمعرفة رأيى بشأن الاعتصام و فضه

يرجى مراجعة مقالة فاكس

 

نرجع لأسبابى الشخصية لتغليط زائرى التحرير اليوم

وربما يكون السبب الرئيسى

هو ان اعتصامهم اتفض

يا جدعان…خلاص بالعربى

الناس مش عايزاكو تروحو التحرير

يمكن شايفين ان الثورة نجحت…أو عايزينها تقف بقى

أو عايزين استقرار و عجلة انتاج

أيا كان اللى شايفينه

فهما مش عايزينكوا

على الأقل دلوقتى…لأنهم حاسيين انهم مش محتاجينكم

عيب شعب التحرير انه فعلا بلا سياسة

مجموعات فردية…ترغب فى تحقيق الأفضل لمصر…مبس معندهمش آلية واضحة و لا سياسة قذرة يواجهوا بيها سياسات الحكومة الماكرة

والنتيجة

انهم بيضربوا فى الفاضية و المليانة

مجموعة من الناس باعوا أنفسهم من أجل الوطن-أيا كان فى تصرفاتهم حكمة أو لأ…أصلهم محكموش بلاد قبل كده-وباعهم وطنهم

وما زلت أكرر دعوتى

لا تنزلوا الى الميدان فهو فى فترة ضعف

اتركوه يستمد قوته

فهو يعرف متى يستمدها

وريحوا الناس وعيشوهم فى الاستقرار و سيبوهم يزقوا العجلة

وارحموا نفسكم من المهانة دى…اللى هى حاليا مش هتكسبوا بيها حاجة

بمعنى آخر

الموضوع محتاج نفكر فعلا…نكون تكتلات كبيرة فيها أهدافنا

محتاجين سياسة

مش معنى كده ان انا ضد ما كان يحدث فى التحرير

لبس أنا ضد النفخ فى قربة مقطوعة…

الشعب لابد و أن يفيق…

واليكم بعض التعليقات من موقع مصراوى كردود على موضوع ضرب متظاهرى اليوم

 

شكلهم وهما مرميين كده فرحني وأثلج صدري…وياريتهم كانوا أكتر من كده عشان الفرحه تزيد

 

ياريت علي كده يا امن علي طول عشان دول شويه اوساخ

 

حد بس يفهمني يعني الجيش والامن ولاد كلب ضربوكم من غير سبب مانتم عارفين ان البلد قررت منع التظاهر بناء علي رغبه اغلبيه الشعب  وافطار ايه ماحدش هايصدقكم انهم اتعدوا عليكم من غير سبب لو سابوكم ويخش بلطجيه تقولوا سابونا من غير حراسه ولو تدخلوا تقولوا ضربونا ماتتهدوا بقي واترزعوا في بيوتكم جتكم نيله جبتلنا الشلل

في كل حاجه وياريت تتعلموا ان البلد فيها قانون

 

هو انتو اية ملكوش اهل اشحال انتو بنات يعنى ماهو لو فية راجل فى البيت يحمكم يا بت انتى وهية مكنتوش نزلنو

 

والمزيد من التعليقات على صفحة مصراوى

http://www.masrawy.com/News/Egypt/Politics/2011/august/6/iftar_tahrir.aspx

 

ها

 

لسه عايزين تنزلوا؟؟؟

ده جزء من آراء الشعب…ملفق بقى أو غير…ابقوا لاحظوا عدد اللايك المعمل لكل تعليق

بمعنى تانى

احنا فى مرحلة جديدة

واضح انها لازم تتسم بالهدوء و الخبث السياسى

وملاعبة الحكومة بنفس طريقتها

 

ولكنى أحب أن أقول لكل من يخاف على وطنه و يحبه

أقول لكل الثوار

مجموعة من الحقائق ربما تثلج صدوركم بعد البلاوى اللى شفتوها

 

حقيقة 1

“ان الله لا يغير ما بقوم حتى يغيروا ما بأنفسهم”

فهل الناس فعلا اتغيرت؟؟؟للأسف لأ…ولسه عايزين تغيير كتير…علشان حالهم يتصلح…وأنا منهم

 

حقيقة 2

النظام قد سقط فعلا

لا تقولوا النظام لم يسقط و لا يزال يحكم…النظام سقط فعلا…وما نراه بقاياه…

يعنى لما الويندوز بيقع….الكومبيوتر بيبوظ ومبيشتغلش…والحل….نسطب ويندوز جديد

بس للأسف تستطيب نظام الشعوب محتاج وقت طويل حبتين….مش سيديهاية

 

حقيقة 3

الشعب عرف كيف يسقط نظامه

وده شىء واضح جدا…وبلاش معتقدات ان الناس هتخاف من الشرطة أو الاسلحة والكلام ده…الناس واجهت مسدسات و قناصة و قنابل ومدرعات وعربيات وكل حاجة

الناس مش هيقوفها حاجة الا اذا جالهم بقى سيد الشر-أو الدارك لورد زى ما بيسموه فى الأفلام-وحاربهم بالنووى أو بالسحر الأسود

ومع ذلك برضه هما عارفين هيعملوا ايه

وأرجع و أقول…احنا مش بتوع حروب أهلية

من الآخر…لو اجتمع الشعب على كلمة واحدة مرة تانية…هيسقطوا أى حد…حتى لو كان الدارك لورد

 

حقيقة 4

الصبر مفتاح الفرج

احنا فى فترة فتن و اختلافات…وفترة ما يعلم بيها الا ربنا…فلنصبر

 

حقيقة 5

حسبى الله ونعم الوكيل

فليقلها كل من تضرر فى سبيل مصر

 

ودمتم بخير

amrrageh.wordpress.com

@Amr_Rageh

فاكس


بسم الله الرحمن الرحيم وبه نستعين

وأعاد الله عليكم شهر رمضان ال”مبارك” بالخير و اليمن و البركات…أما بعد…

ف كلمة “فاكس” هنا بالعامية تعنى “نفض” أو “طنش” أو “بلاش دوشة”….بالعامية برضه

أتى شهر رمضان الذى ينتظره الجميع من عام لآخر…ومضى أول أيامه…

أعتقدت للحظة أن اليوم انتهى وقارب موعد الافطار و الحياة حلوة!!!واذ بيا أفتح الفيس بوك-لعنة الله عليه-و أفاجأ بما يحدث فى التحرير

أنا أحب فقط أن أستوضح بعض النقاط…هى ليست هجوما على أحد بعينه على رأى أو آخر…هو مجرد حديث عابر لبعض الأفكار التى تراودنى…

1.ملحزظة:الشرطة موجودة و بتشتغل اهه…ليه مبنشوفش الشرطة دى غير فى البلاوى؟؟؟

ليه فى كل شارع و حارة الناس بتتخانق و بتموت بعض و الشرطة بتتفرج؟؟؟

هل فعلا احنا مصرين نعيش تحت مبدأ”أصل الشرطة خايفة؟؟؟”

عذرا من يفكر بهذا المبدأ فهو لا يرى الواقع و لايشعر به و لايفهمه…وتقريبا لا يفهم أى شىء-ده رأيى الشخصى-

البعض كان يداهمنى بجملة”كل الضباط بيقولوا احنا معندناش أوامر نشتغل”..وده اتضح فعلا انه صح لأن الشرطة-بارك الله فى أعضائها-لا يظهرون الا فى أوقات محددة لتنفيذ أوامر محددة…عدا ذلك فقليلا ما نرى بضع من رجال المرور-العساكر تحديدا-وشوية عربيات شرطة ماشية -بتروش-فى شوارع المحروسة

علما بأن رجال الشرطة الشرفاء ماخدوش أوامر انهم يقبضوا…هل معنى كده انهم مبيقبضوش؟؟؟ده هناك الكلام ده!

 

2.من يجلس فى ميدان التحرير؟؟؟

اللى أنا أعرفه هم:

-أهالى الشهداء

-بعض الحركات وممثلى الأحزاب

-ناس عادية-بتروح و تيجى

-باعة جائلين

-بعض الشباب اللى بيروش و عامل ثوار

-أكيد فى ناس مصلحجية و وحشة و فيها كل العبر قاعدة برضه هناك

 

سؤال…نفتكر ليه الناس فى عز شهر 6 و7 قاعدين فى الميدان على الرغم من ان الجو فى مارينا و باقى مدن الساحل الجو فيها أظرف و ألطف؟؟؟ليه تفتكروا ما سابوش التحرير الحر وسابوا الرصيف و الخيم وراحوا حتى العجمى أو قعدوا على أقل تقدير على كورنيش النيل؟؟؟؟

أكيد لأنهم ناس فقرية…بيحبوا الفقر…وبيحبوا الحر…وبيحبوا الزحمة و القرف و عاجباهم الحياة الثورية

سبب لا يوجد ما هو أكثر منه منطقية!!!

بس عذرا فيه سبب تانى أحب أتكلم عنه…

ربما المجلس العسكرى يكون أحد الأسباب…

ربما هو متباطىء…متواطىء..حاجات كده…

بس مش هو السبب الرئيسى

السبب الرئيسى هم من يدعون انهم ثوار

مش الثوار اللى فى الشوارع…أنا بتكلم عن ثوار التليفزيون و المكاتب

على الرغم من ظهور الكثير و العديد و المريع من الأحزاب و القوى السياسية…الا انها كلها “فشنك” و “أى كلام”…شوية ناس تخاف كل الخوف من الحاكم أى كان…وبقوا عايمين على الموجة…يتكلموا و يشتموا و يهللوا فى التليفزيون و الصحف و النت و كل حتة…ولا يهمهم حقيقة الا حبة مصالح بيفكروا فيها…ربما فلوس,حكم,الله أعلم…

ولكن لم نرى فى أى حزب-أو على الأقل أهل التحرير-منهم أى فائدة أو ذرة أمل فى انهم يجيبوا للناس حقوقهم و علشان كده نظرا لفقدان الثقة فى الحاكم-المجلس العسكرى- والحكومة و باقى القوى السياسية….الناس بيتت فى التحرير أن التحرير اتعرف انه وسيلة ضغط كويسة

 

3.الى كل السادة المقيمين بمنازلهم و عليهم مراعاة فروق التوقيت…أحب تذكيرهم ببعض الأمور

بدأت الثورة يوم 25 يناير من ميدان التحرير

قلبت الثورة البلد يوم 28 يناير بعض وصول الثوار الى ميدان التحرير

لم يكن ليتنحى السيد الرئيس الأسبق-اللى أنا شايف أن معظم أبناء هذا الوطن الأبرار يستحقونه رئيسا بالفعل-الا باستمرارية الثوار فى ميدان التحرير طوال ال 18 يوم…تحملوا الضرب و القتل و التخوين و البهدلة و كل حاجة مش كويسة من أجل رحيل الرئيس

لولا أهل التحرير-أى الثوار-ما كان المجلس العسكرى-هداه الله ووفقه لصالح أمتنا- اتخذ عدد من القرارات فى الفترات السابقة

هؤلاء الناس-مخربى البلد-هم ليسوا من الملائكة حتما…وليسوا من أولياء الله الصالحين…منهم المحترم و الغير…منهم الشريف والغير…منهم الحق و الغير…وهكذا

طب هما مخربين!!!ما فسش اعتراض

لماذا الهجوم عليهم بهذه الشدة…ولماذا نلتمس العذر لكل من فى الدنيا…المجلس..الحكومة الحالية و السابقة….الشرطة…أى حد ممكن يغلط الا هما…حقيقة أنا مش قادر أحدد هذا السبب

ربما لأنهم المفروض يكونوا قدوة صالحة؟؟؟يمكن بس أرجع و أقول محتوى أهل الميدان له تيارات فكرية و غير فكرية كثيرة

للعلم بالشىء بس…يوم الاربعاء اللى فات كنت هناك…أحب أعرف الناس-لا أعرف مدى مصداقيتى عند الناس-أن أنا قابلت شخصين ووقفت اتكلمت معاهم عن الأوضاع الحالية….وكانوا بعيدى البعد عن كل التيارات السياسية…

واحد كان فنى تركيب أجهزة…والثانى موظف فى النيابة

لاهم ليبراليين…ولا اخوان…ولا حاجة خالص

شوية ناس عادية فى الشارع….

بس أرجع للنقطة المهمة…وهى ان الناس اللى كانت هناك أعتقد أن معظمهم كانوا اما بيطالبوا ببعض الحقوق لأنهم أهالى شهداء…أو انهم فعلا عايزين يضغطوا على المجلس بحيث نبدأ تكوين نظرية الشعب يحكم نفسه

الكثير اعترض و اتهمهم بأنهم لم يولهم أحد للتكلم نيابة عن الناس….أرد عليه و أقول-وده رأيى الشخصى برضه-وسيادتك ما اتكلمتش ليه؟؟؟ما ده معناه انك راضى بالوضع عموما أو انك ملكش رأى أو بتحب تحتفظ برأيك لنفسك وهو ما يعنى انك برضه مالكش رأى!!!!!

أنا لم أنيب عنى أحد للحديث…صح…بس أنا كمان محاولتش أتكلم مع اللى -عامل كبير-وأقوله رأيى…

الموقف ده بيفكرنى بماتشات الكورة….لما بيتحول كل المشاهدين المصريين الى مدربين و يفضلوا يعدلوا و يحطوا خطط طول الماتش و يتهموا المدرب بالفشل!!!!!

انتم قاعدين فى بيوتكم…أو فى شغلكم مش هنختلف…

وفى ناس مبيتة فى الشارع معطلة الدنيا و خرباها…يحاول-ولنقل أصغر جزء فيهم-انه يحقق حاجة للبلد…بلاش معظمهم دى!!

ده لو واحد وقف فى الشارع و طالب بحاجة حق المفروض نقف معاه….

ما علينا…هما ناس وحشين و بيتصرفوا غلط و ملهمش حق فى حاجة…وليتحدث العقلاء!!!

 

أعتقد أن هذه الثورة ما كان لها أى لازمة…لأن الناس لم و لن تفهم فى الفترة الحالية ما هى الأسس التى يجب أن يعيش عليها الانسان وواجبه نتجاه بلده و حقوق بلده عليه

 

خفت أن أذكرها يوما…ولكنى سأذكرها

صدق اللواء عمر سليمان حينما قال:”الشعب المصرى غير مستعد للديمقراطية”…لا أفهم لماذا ثارت الدنيا و هاجت؟؟؟

ما يحدث الآن ما هو الا التفسير المنطقى الصحيح لما قاله الرجل…نحن شعب لا نستشعر أو نفهم معنى الديمقراطية

ده غير اننا شعب شديد البعد عن الدين فى الفترة الحالية

الكلام اللى جاى هيحسس الناس انى ليبرالى ماسونى متطرف…بس أنا مش كده على فكرة….أنا بقول رأيى الشخصى المتواضع

كيف يقبل الاخوان و السلفيين ما يحدث تجاه اخوانهم فى التحرير أو يقبلوا ما يحدث فى البلاد عامة من تواطؤ و تباطؤ و حاجات عجيبة….أين القصاص؟؟؟أين تطبيقهم للشريعة -التى يزعمون انهم مطبقوها-لماذا يقولون للمجلس حاضر و طيب كما كانوا يقولونها من قبل للنظام الأسبق

هل تطبيق الشريعة فيه خيار و فاقوس؟؟؟ناس تتحتكم محاكمات عسكرية من الشارع ومحاكمات النظام-ده على سبيل المثال-يمشى بالقانون المصرى العظيم اللى تلت ارباعه خربنا بحيث تؤجل قضايا و يبرأ البعض؟؟؟

ده جنان ده ولا ايه؟

طب الليبراليين والعلمانيين اللى بيروج انهم احتلوا البلد ناس مش بتاعت دين و لا حاجة…فاهمينهم دول

أمال الاخوان تحديدا عايزين ايه بالضبط؟؟؟؟ايه الهدف اللى هما بيرجوه؟؟؟هل فى اعتقادهم انهم هيوصلوا للحكم وحينئذ هيطبقوا بقى الشريعة؟؟؟والله كانوا وصلوا من زمان….!!!

ومع ذلك فلا ينبغى أن نشكك فى نوايا أحد فلا يعلم النوايا الا الله عز و جل

للعلم بالشىء…أنا لا أتحدث عن الاخوان و السلف اللى زى كده…ناس عادية يعنى…لأن مينفعش ومن غير المنطقى ان الواحد يتكلم عن مجموعة كاملة من البشر انهم غلط

أنا بتكلم عن القيادات فى الأحزاب أو قيادات الجماعات ذات التوجهات السياسية

وبالمرة طالما الواحد خبط…فنكمل تخبيط

قرأت من كام يوم كده يتحدث فيها أحمد العسيلى عن الأخلاق…ويقول ان مصدرها النفس البشرية فى الأساس مش الدين لأن كل الأديان بتدعوا لكده-ده حسب ما أنا فهمت

نصيحة…ده بيقول أى كلام لأن السيد الفاضل لو كان يسمع عن الدين كان عرف ان النفس أمارة بالسوء…وده معناه أن النفس بتدعو لفعل كل ما هو سىء و تجميل الفعل فى عين الانسان…والأديان السماوية جاءت لتقويم و تعليم هذه النفس…يبقى الأخلاق مصدرها الأديان….عيب لما واحد يكتب الكلام ده فى جريده المفروض ليها شعبية زى جريدة التحرير!!!!!

 

وأخيرا…الى كل من كره الثورة

وكل من كره ميدان التحرير و رواده

وكل من اتهمهم بالعمالة والخيانة و انهم من أصل صربى

وكل من قال انهم بلطجية و حرامية و مخربين

وكل واحد كان عايزهم يمشوا

وكل واحد قال انهم مبوظين استقرار بلدنا الحبوبة

 

الاعتصام اتفض

اتفض بقى بالقوة….بالجبنة…مش مهم

أنا شخصيا بعتذر لأهالى الشهداء و أقول لهم:حسبكم ربكم

وبقول لكل شخص كان بيحاول بأى طريقة انه يحقق الأفضل لبلده و كان دائم الوجود هناك…ريح دماغك…وأقعد فى بيتكم

 

وبعض فض الاعتصام اللى كان مسبب خراب الكرة الأرضية

 

أنا مستنى أشوف الاستقرار…

ومستنى أشوف قيادة المجلس الحكيمة هتعمل ايه…

ومستنى أشوف الحكومة-المضغوطة-هتتصر بقى ازاى بعد فض الاعتصام

ومستنى عجلة الانتاج اللى عطلها مخربى التحرير تدور بقى و تنغنغنا…

مستنى بقى الشرطة تنزل و تباشر أعمالها…مفيش خوف ما التحرير فضى و مفيش مشاكل

مستنى أشوف الأحزاب السياسية المختلفة وهى بتنشر الديمقراطية و مبادىء العدل

مستنى المجلس يقر العدالة للجميع

مستنى الحياة تبقى دبدوبية

مش دى الوعود اللى كانت بتتقال انها هتحصل لما الوضع يهدأ وميبقاش فيه قلق؟؟؟؟

قشطة..

أنا بعدو كل من كانوا فى التحرير المغادرة و عدم محاولة الرجوع الى التحرير مرة أخرى

ونتفرج نشوف ايه اللى هيحصل فى البلد

 

مننساش أهم حاجتين

الاستقرار….والعجلة!!!!

 

وأحب أقول لمعظم الناس…ولنفسى أولا بعض كل اللى شوفته من يناير لحد دلوقتى…..

 

 

فاكس….